Ang pinakarason kung nganung akong gi himu kining sulata kay para mahibaluan nimu ma'am nga nalipay gyud ko sa imung mga nabuhat nako kaniadto pa. Busa, gusto kong magpasalamat ug dako kay ug dili tungod nimu, dili ko ing-ani run nga pagkatawo.
Akong unahon katong naa pa ko sa una nakong tuig diri sa NORSU.
Sa pinakauna nakong pagkakita nimu ma'am, kaingon ko ug buotan ra ka kay sige ra man kag pakatawa namu ato. Pero diay, dili mao akong gihunahuna diha nimu. Bruha man diay ka. Wala ra kaayo nimu gipakita kay bag-o pa man tawon mi unya basin mutalaw mi dayun ug mang-undang.
Kadali lang sa pagdalagan sa panahon. Mas nailhan ka sa kadaghanan. Kahinumdum pa ka nga akong klase nimu sa una magsugod ug alas 7 sa buntag dayun akong balay baynti-otso pa ka kilometros gikan sa iskwilahan? Tawon pud nakong dinalagan kada Martes ug Huybes para ra maka apil sa imung klase. Unsaon ta man nga manirado man diay kas pultahan sa classroom para dili na kasulod tung mga tapulan mangmata ug sayo. Kaduha gyud ko nimu gisirad-an. Kabalo ka unsay akong gihimu sa guwas? Gatanga ra intawon. Wa gud laman ka nalouy. Wa pa gyud ka nakontento sa imung gibuhat. Nihatag pa gud ka ug exam sa klase nga perteng taasa unya atol pa gyud nga late ko. Nganung wa na gud laman nimu gihatag atong nakasayo ko. Salamat kaayo ato ma'am. Mura kog nabuang hinuna-huna ug unsa nay itsura sa akong grado.
Gikalimtan na nako to ma'am. Ayaw kabalaka ana. Pero naa pay usa. Naulaw jud ko ato nga taknaa tungod kay dako kaayo imung tingog sa pagbundak sa akong matuy-od nga apelyido. Abi far-sighted ka, imu na lang kong daug-daugon. Tablaw na kog dinali-dali para ra gud dili nimu masakpan nga ga flats ko. Pagkahinla pa, ni shagit jud ka. "Catanus!" Unya dayun imung simud nibuslo rag kalit. Ang imung mata nigamay ug ang imung liog ni taas. Matay nakong kulbaa ato. Kaingon ko ug imu nakong lansangon ato. Maayo gani kay layu-layo na ko nimu ug nagpadayon na lang ko sa paglakaw bisan ug gitawag na akong apelyido. Nakabalo ko magbinaga atong mga panahona. Tungod na nimu ma'am. Salamat kaayo.
Karong naa na ko sa akong ikaduhang tuig diri sa NORSU, nakakita na pud ko kung unsa ka ka-bruha. Aw, ako na lang pung ingnon nga sala ni sa mga lalaking wala nag-paalot. Mutuo na gyud ko nga kung unsa imung isulti, mao gyud na imung buhaton. Pagkakita nimu nga tag-as na ang mga buhok sa mga lalaking future teachers kuno, nikuha dayun ka ug gunting gikan sa imung drawer dayun imung gibinagsa ug tawag ang kada-usa sa ilaha. Gihawiran nimu ilang mga tingkoy ug gipamutol. Bali pa gyung hiwia nga ma klaro gyud nga murag gi-tripngan ug adik. Luoya gud intawon sa ilang mga nawong. Nan! Nakapa-alot sila ug dili oras. Nganu man gung ganahan mag-maestra dayun mag-pataas ug buhok. Napahak na nuon. Kalataw-an man tan-awon pero naluoy pud baya ko nila. Sige na lang. Nahuman na pud bitaw tong panghitabua.
Ug karun, pinakabag-o sa tanang kabruha-an nga imung gibuhat. Niingon ka nga dili na ka mudawat sa amung Teaching Aids Bank kay walay mga sulat amung papel sa Episode 4. Nanghilak intawon ming mga tapulan manulat kay wa nami grado. Unsaon na lang amung major nga usa ra ka unit dayun mao pa gyuy hinungdan nga mahagbong mi. Bruha gyud ka, bisag unsaon ug bali sa kalibutan.
Pero karun nga ga-ulan ulan ug dayun nabuotan mig gama ug Teaching Aids Bank bisan pa ug wa mi ingna nga mag-gama, ni-ingon na nuon kang amung i-improve amung visuals kay ganahan kang makapasar ming tanan. Hastang lipaya sa amung mga kasingkasing pagkadungog nga gitagaan mi nimu ug laing tsansa. Mag pista kus amung baryo run ma'am. Adto ha! Ikaw amung letsonon. Wa man gud kay klaro uy.
Wala man ko nagdumot nimu. Wala koy kalagot nimu. Dako pa man gani akong pagpasalamat nimu. Kinsa guy dili magpasalamat anang naa nami tsansa nga maka pagwapa ug tarung kay dili gud tawon ka mudawat anang mga babaying dili mag-high heels, dili mag-stockings, ug dili magpapula sa ilang mga ngabil.
Dako na lagi kag natabang. Daghang salamat ani ma'am. Ikaw ug ang imung salimuang nga personalidad, di gyud nako hikalimtan. Ako ning dad-on hantud sa akong kamatayon. Amen.
Gamahal ug garespetar nimu pag-ayu,
Rolyn Jane P. Catanus
0 citrus juice/s:
Post a Comment